It-Taqsima tal-Għotjiet ta’ Manteniment lill-Istudenti (SMGU), fi ħdan il-Ministeru għall-Edukazzjoni, Sport, Żgħażagħ, Riċerka u Innovazzjoni, b’kollaborazzjoni mal-Istitut għas-Servizz Pubbliku fi ħdan id-Diviżjoni tal-Poplu u Standards fl-Uffiċċju tal-Prim Ministru, qiegħed jistieden lill-istudenti li qegħdin full-time biex japplikaw għall- Iskema ta’ Esposizzjoni ta’ Xogħol tal-Istudenti fis-Sajf 2025

Min jista’ japplika

Studenti full-time li jkunu qegħdin itemmu l-edukazzjoni sekondarja obbligatorja tagħhom, (Form V/Sena 11), kif ukoll dawk irreġistrati f’korsijiet sa Livell 3 tal-Qafas Malti għal Kwalifiki f’Istituzzjonijiet Edukattivi jew Vokazzjonali oħra, inklużi dawk li qegħdin fl-aħħar sena tal-istudji tagħhom sal-livell 3 tal-Qasam Malti għal Kwalifiki huma eliġibbli li japplikaw.

L-istudenti li qed isegwu korsijiet fil-livelli 4, 5, 6 jew 7 tal-Qafas Malti għal Kwalifiki għandhom japplikaw mal-Istitut għas-Servizzi Pubbliċi (IPS).

Applikazzjoni Onlajn

Studenti interessati għandhom jissottomettu l-applikazzjoni onlajn fuq https://edurecruitment.gov.mt/ u jtellgħu kopja skenjata miż-żewġ naħat tal-Karta tal-Identità tagħhom. Studenti li spiċċaw l-edukazzjoni sekondarja obbligatorja matul din is-sena skolastika (2024-2025) għandhom jissottomettu dikjarazzjoni mill-Kap tal-Iskola rispettiv bħala prova li lestew il-Form 5/Sena 11.

F’każ li l-informazzjoni mitluba ma tiġix provduta kif suppost u fil-ħin inkluż il-kopji skenjati mitluba l-istudenti jistgħu jiġu skwalifikati minn din l-iskema.

Studenti tal-MCAST jew studenti f’Istituzzjonijiet Edukattivi oħra li qed isegwu korsijiet sal-livell 3 tal-Qafas Malti għal Kwalifiki u li mhumiex eliġibbli għall-istipenju, huma mitluba li jtellgħu provi li huma għadhom jistudjaw, inkluża kopja skannjata tal-Ittra ta’ Aċċettazzjoni/Reġistrazzjoni għas-sena akkademika 2024-2025 u Lista’ ta’ Impjiegi ta’ Jobsplus tal-istudenti.

L-applikazzjonijiet onlajn jiftħu nhar it-Tlieta, 15 ta’ April 2025 f’nofsinhar u jagħlqu nhar il-Ġimgħa, 9 ta’ Mejju 2025 sa nofsinhar (ħin lokali). L-istudenti eliġibbli se jintalbu jagħmlu test onlajn wara l-aċċettazzjoni tal-applikazzjoni tagħhom.

Fażijiet tax-Xogħol

L-istudenti huma mitluba jagħżlu wieħed mill-oqsma tal-istudju li jinteresshom. Minħabba l-għad kbir ta’ applikanti, l-istudenti se jkun qed jaħdmu fażi waħda biss ta’ erba’ (4) ġimgħat kull wieħed. Għalhekk, l-istudenti għandhom japplikaw għal Fażi 1 jew għal Fażi 2 billi jissottomettu applikazzjoni separata għal kull fażi. Madankollu, l- studenti jistgħu jagħżlu li japplikaw għaż-żewġ fażijiet biex ikun hemm aktar flessibilta` u possibilta` li jiġu allokati. Pero, dan jiddependi fuq in-numru ta’ applikazzjonijiet li t-Taqsima tirċievi mingħand entitajiet li jħaddmu l-istudenti fis-Servizz Pubbliku / Settur Pubbliku.

Minħabba li din hija opportunita’ ta’ espożizzjoni ta’ xogħol, it-Taqsima tal-Għotjiet ta’ Manteniment lill-Istudenti, ma tistax tintrabat li talloka studenti eżatt għall-qasam ta’ studju li jkunu applikaw għalih, peress li dan jiddependi kemm mit-talbiet ta’ min iħaddem kif ukoll mill-marka li l-applikanti jkunu ġabu fit-test onlajn.

Studenti li jkollhom il-fażi tax-xogħol tagħhom estiża fuq talba minn għand min iħaddimhom u wara l-approvazzjoni tat-Taqsima, jeħtieġ li jerġgħu jimlew Formola tal-Bidu tal-Impjieg kif ukoll dik ta’ Terminazzjoni tal-Impjieg tal-Jobsplus biex ikopru l-perjodu addizzjonali tal-fażi tax-xogħol.